السلام عليكم ورحمة الله وبركاته
....
صار إلنا فتره في البيت
عندنا إدمان بتر شيكن
butter chicken
فقررت اتعلم البتر شيكن
وكل مره اقول بسير
كيرلا سوبرماركت
وهو سوبرماركت متخصص
بكل شي هندي وعندهم في قسم البهارات صديق
وايد زين كل ما نسأله عن طبخه يعطينا البهارات المناسبه
وحليله هذا نفر واجد زين :)
المهم ما لكم بطول السيره رحت السفير ماركت
وكونه عندهم كل ما يختص بشرق آسيا
فسهل علي المهمه
أول شي دورت البهارات الخاصه
ولقيت اكثر من نوع
ورحت على مكان الصنع وخذت نوعين
واحد صناعه باكستانيه والثاني صناعه هنديه
وحست شوي على الثلاجات
ويبت المكونات بعد تعب
لأنهم ما عندهم أنواع وايد مثل كارفور بخوصوص
أنواع الدجاج
بس توضيح صغيرون
أنا مب فاشله بالطبخ
بس أنا ما احب أطبخ
وما أحب ألتزم بالمقادير
وصج الطبخ مزاج
يعني لحد يقول أبي وسويلي
وتصير سالفه كل يوم وأنا في المطبخ
من ألحين مفهوم (تهديد) :)
...........
وإليكم مكونات الطبق
طبعا الدجاج ممكن يكون طازج
أما انا خذت علبيتن دجاج تندوري مجمد
علبة خلطة بتر شيكن ميد إن إنديا
قشده سائله المعروفه ايضا
بإسم كريمه مخفوقه
خبره ماشاء الله علي ما كأني
قريتها على العلبه :)
براتا مجمده
باباد
.....
أولا لأن الدجاج مجمد خليته فتره
لغاية ما خف التجمد من عليه
وبعدين
ضفت مغلف البهارات
مع إستكانة قشده
وعزيزتي إبدأي بالتقليب
وخلط المكونات جيدا بيدكِ الجميله
وياريت لو تغسلون إياديكم وترتدون
القفازات خصوصا لأهل الأظافر الطويله
وإلي يصبغون اظافرهم :)
أتشرط :)
هذه الفقره بالتعاون مع وزارة الصحه :)
ويترك لمدة ربع إلى نصف ساعه
.....
وهذا يكون حال الدجاج المسكين
ومن ثم
إنييب المقلاه
وياريت تكون تيفال ومن النوع إلي ما يلتصق
أبدا ما أسوي دعايه :)
وتكون غزيره ضروري
نحط ثلاث ملاعق زيت
لا تكثرون
وهنا البارت الصعب علي لأني اكره الزيت والقلي
ولازم يطرطش علي
لذلك إحتفظوا بكريم ميبو أو سودو
للحروق والجروح :)
نبدأ القلي والتقليب قليلا
وبعدين نسيت اكمل تصوير
يعني أطبخ وإلا أصور :)
المهم بعد القلي نضيف
300 مل من الماء
يعني ثلاث أرباع غرشة الماي الصغيره
لغاية ما نجد الكثافه مناسبه
ونخليه لغاية ما ينضج الدجاج
ومن ثم نضيف
ثلاثة ملاعق طعام قشده
ونخليه شوي وبعدها يكون الطبق جاهز
نزينه بكسبره ما أدري بقدونس
المهم شي أخضر :)
.....
باباد يمممممييي
البراتا
طبعا البتر شيكن يفضل معه خبز النان
بس أنا يبت براتا
وأحلى شي بهالبراتا طعمها حلو وسريعة التحضير
يعني طلعي البراتايه من الكيس
حطيها على مقلاه ناشفه وتكون من نوع إلي ما تلصق
ومن ثم نقلبها على الجهتين ما تاخذ دقيقه
وطبعا نسيت أصور التقديم وهالسوالف :)
ويا حبذا لو سويتوا كرك
حليب بالشاي يعني بس على الطريقه الهنديه
وتستاهلون الطريقه
ملعقتين طعام شاي
أو ست حبات من
أكياس شاي ليبتون
وأفضل نوع هو الليبتون
حليب أبو قوس سائل عدد إثنين
هيل مطحون ملعقة صغيره
فنجانين من السكر
وطبعا مــــاي (ماء)
وأفضل قياس
يكون ثلاث أرباع الدله
وتغلى المكونات
......
المهم الأكله ماشاء الله طلعت لذيذه
صحيح فيها شوية أخطاء يعني زيدت زيت وماي
بس تداركت الموضوع
إحم إحم إخواني يسألوني من اي مطعم ومنو إلي مسونها
طبعا هذا بعد ما أجبرتهم يا كلونها وحطيت اللقمه
غصب في حلوجهم
جان استانس
وحرمة أخوي مدحتني وايد :)
وأمي وبطوطه بعد عيبهم الأكل
يا سلام ....
بالعافيه عليهم
وسلامتكم
....
في حفظ الله
وأنا اصور الذره 
يميييي لذيذه 
لعبان الصغاريه
