الثلاثاء، 7 ديسمبر 2010

البر تايم :)

السلام عليكم ورحمة الله وبركاته
....
يوم الجمعه
إتفق إخوتي على يوم السبت
كموعد لرحله إلى البر
وتم الإتفاق على التجمع الساعه الحادية عشر صباحا
الله يرحمك يا ابوي من بعد صلاة الفجر
يكون موعد الإنطلاق
بس زينه الطلعه متأخر الواحد
يشبع نوم ويسير مصحصح
تجمعنا وطلعنا إخواني وعوايلهم
وبيت خالي
وأول شي نكمل النواقص
خبز وثلج
وستريبسل
كل الناس مرااااض:)
وصوره خطيره لستربسل بطوطه
لفينا ندور مكان لقينا منتجع بانيان
دورنا مكان ثاني كل البر مسيم وممنوع
الدخول وعفسه
رجعنا لمنطقة مزرع
وما أدري شو صار للغاف
الشير كله مقصقص


والحمدلله لقينا مكان زين
فرشنا ويلسنا
وقلنا حان وقت الغداء
طبعا الغداء جاهز من البيت
مجبوس دياي
شو رايكم فيني وأنا اغرف

سلطه

حبيب قلبي
الكرك


الصغاريه ستانسوا وعيدوا
رمل وركيض
بسم الله عليهم برهوم وعبود
أكثر إثنين حاسين بالجو
محد ينازعهم يسوون إلي في خاطرهم

عبودي مريض
فلابد من الأدول
شوفوا غرشة الماي
أمي تقول ماي خالي الدسم :)


راشد ولد أخوي
يشويلنا ذره
ماشاء الله عليه
وأنا اصور الذره
راشد يقولي خليتي كل الذره الزينه
ويتي تصورين حزت الذره المعوقه
يقصد إلي بالنص :)


يميييي لذيذه
تسلم إيدك أبو سنيده

طبعا بر
فلابد من إنه يخطف عليكم الخلق
دراجات وسيارات وهالسوالف


البر تايم
هالجماعه يمشون
وعيونهم تحت
مب يتأملون جمال الرمله بس
البي بي مب مقصر
كووول

لعبان الصغاريه
سلامي ولد أخوي
سار وزرع الذره
كيفه سلومي :)
وشوي وإلا شمشومه زرعت حذاله ذره
ماشاء الله عليهم :)

علاوي وسلومي
والرمل تايم :)
متأثره بجماعة البي بي
بعد السوالف والعلوم
والضحك بدأ الشوي تايم :)وبعد تورية الكوار في الفوق
ورينا الضو
لحم ودياي بالروب :)
فلفل رومي وبصل
إلي مكفن بالقصدير فندال :)



وقرب وقت الرجعه ديايه مبهره وبطاطس
رجعناها البيت وتعشيناها
على الضو بجوار قرص الدرب
ولغير العارفين بقرص الدرب
هو عباره عن طحين رقم 2
وشوية ملح وماي
ودايركت على الجمر

بعدين نفت القرص
ونضيف له السمن والسكر
وبثواني يختفي لذييييييييييذ
وهذا من تراث الوالد الله يرحمه
ناس مروا علينا مسوين مسيره وشوي ويغرزون
والأهم غوري بطوطه
تأخرنا بسبته
بس الصراحه
تسلم إيدها
شاي مضبوط

ونحن طالعين من المنطقه
لقينا بعد ناس مغرزين
.....
والحمدلله
كان يوم ممتع
غيرنا جو وستانسنا
شكرا إخواني على اليوم الجميل :)
.......
في أمان الله

هناك 46 تعليقًا:

انا يقول...

لوووووول

خوش كشته والله :)

purpleyah يقول...

الله محلى هالتصوير عيشتينا الجو بصراحه ،،، كله كوم والشاي الكرك والمشاوي كوم

تسلمين الغاليه

رورو الشخبوطه يقول...

ماشاءالله خوش كشته..

بس العيش احنا نسميه برياني ,مجبوسنا غير ..

بالعافيه يارب..

بس شنو يعني فندال ؟؟

غير معرف يقول...

عليكم بالعافية
ماشاءالله تونس الصور. عساكم دايما مجتمعين إن شاءالله بالأفراح :)

(ست* جنى* الحسن) يقول...

سلامو عليكو..

واضح ان الرحلة كانت جميلة
لكن مليانة اكل

بصراحة انا جوعت على الصور والريحة
وصلتنى.......

الله لا يحرمكو من بعض
لك تحياتى

هديــل يقول...

الله

شكلها خوش كشته

ان شاء الله استانستوا


عجبني شكل الكرك ! بس شنو اهو شنو مكوناته .. امم يمكن جاي حليب :) ؟

وبالعااافية

أضعت منظرتي يقول...

ماشاء الله روعة

والبر هذي أوقاته مع الأجواء الحلوة

لكن أجمل شي بعد الفجر


موفقين إن شاء الله والله يقويكم

mese يقول...

مساء الخير..

يا سلام حلوه الرحلة..ويلسة البر وخاصة بظل الغاف رووعة ..

كل الصور حلوه.. وشهيتينا بكل شيء خاصة الذرة والفندال..
وقرص اليمر كأني أشم ريحته, حلو بعد لما نغمسة بحليب البوش ؛)

صور الغاف ماشاء الله وايد حلوه..
والصغار بعد هم أصلا أكثر شيء يستانسون باللعب على العراقيب والرمل..

*رورو الشخبوطة:الفدنال = البطاطا الحلوه :)

شكرا على الرحلة الحلوه نهار عيشتيني جو البر..

ناعمة الهمس يقول...

مميزة الطلعة

رورو الشخبوطه يقول...

هلا ميووسه..

مشكوره ع التوضيح :)

Amwaj يقول...

السلام عليكم :)

عليكم بالعافية هالكشته :)
والله يرحم أبوج إن شاء الله

والله يخلي برهوم وعبود وراشد :)

وعسى الله يخليلج اخوانج ولا يفرق شملكم

غير معرف يقول...

البر وما أدراك ما البر..صج وناسة وأجواء يديدة بس المشكلة من بداية الرحلة لي نهايتها والناس تاكل...

بس أحلى شي موضوع زراعه الذرة ...:)

الغدوف يقول...

ماشاء الله
الرحلة روووعة , وأجوائكم حلوة بعد للطلعات والكشتات

التصوير كان الجو إللي عشته معاك بالرحلة
تسلم أياديك
وعليكم بالعافية
ودوم مستانسة يارب :)

elekomm - إليكــم يقول...

السلام عليكم

عندنا في ليبيا مثل هذه رحلات نسميها " زردة " .

من خلال الصور اعتقد أن رحلات البر هناك مثلنا تماماً .

شكراً لك لنقل الصور لنا.

الشاعر الفنان أحمد فتحى فؤاد يقول...

الله الله الله

طلعة جميلة ممتعة

بمناسبة الفندال .. كنا طالعين نشوى و نسيت الفندال .. رحت أدور عليه فى كل مكان و أنا بسأل عليه بإسمه الدارج فى مصر ( البطاطا ) و كل واحد يطلع لى البطاطس و يقول هذى البطاطا

لغاية ما أنقذنى صديق إماراتى جميل و قال البطاطا عندكم عندنا فندال
و البطاطس عنكم عندنا بطاطا
ذاكر كويس

ربنا يسعد أيامك

تحياتى لك

عطش الصبار يقول...

وحشتيني يا نهار
والصور جوعتني
رحله سعيده

غير معرف يقول...

من مياسـه ..~

يــآ ســلآم يووم ولا اروع صراحـتــاً.. =)

>> تـآيم << ههههههه يبالج بي بي

برهوم شاف الصوره جان يقوول عبودي + سيكل خخخخخخ


انشالله اتدوم هالطلعــآت ..


مشكورين كلكم عالطلعه > ابوي و عمومتي < وكلكم ..

خذيتلي كم صوره .. هع

مشكــوره .. ^.^

~أم حرّوبي~ يقول...

شرات ابوي يااا نطلع اول الصبح قبل ما ينشون الخلق ولا ماشي طلعه بر :)

ياحلو طلعات البر ..احلى شي ^^

المجبوس يخلي بطني يصوصو خخخ

والكرك لا تعليق :)

وصدقه يتي عالذرة المعوقة خخخخخخ

يبالي اجرب قرص الدرب ..شو سويت ولا مالح ؟؟

والشوي في البر ...يوووه احلى شي

ناااااايس حبيت الطلعه ودي لو كنت وياكم ^^

يعطييييييج العافيه :)

صفحات مُلطخّة بحروفي يقول...
أزال المؤلف هذا التعليق.
مهرة سالم يقول...

أنـــا ..
تسلم أخوي
حياك الله

مهرة سالم يقول...

Mrs.Purple........
تسلمين الغاليه
حياج إقربي :)
شكرا لمرورج
في أمان الله

مهرة سالم يقول...

رورو الشخبوطه...
الله يعافيج الغاليه ...
شوفي البرياني والمجبوس الشكل واحد بس الفرق بالطعم طبعا هذا عندنا في الإمارات ما اعرف بالكويت غير مموش الربيان ومطبق الزبيدي :)
...
وميسي ما قصرت ردت عليج
تسلمين ميسي:)
ومشكوووره رورو على مرورج :)
..
في حفظ الله

مهرة سالم يقول...

حنــــان ....
الله يعافيج..
وتسلمييين
وربي يجمعج مع من تحبين دنيا وآخره
...
في حفظ الله عزيزتي ..

مهرة سالم يقول...

ست الحسن جنــى ....
وعليكم السلام ورحمة الله وبركاته..
أهلا ياقمر ..
ربنا يبارك فيكي يا عسل
وربنا يحفظلك بنتك وزوجك
وشكرا لمرورك الجميل :)
..
في أمان الله اختي

مهرة سالم يقول...

هـــديل ....
هلا هدوووله
الحمدلله استانسنا وغيرنا جو :)
...
يس إنه شاي بالحليب
بس تغلينهم مع بعض
...
الله يعافيج الغاليه
في حفظ الله

مهرة سالم يقول...

أضعت منظرتي ...
تسلم يا أخوي
ماشاء الله الأجواء ألحين ممتازه للبر
..
وفقك الله في ما يحبه ويرضاه
وشكرا لتواصلك
في حفظ الله

مهرة سالم يقول...

ميــسي ...
هلا وغلا بمسمس ...
وحليله الغاف مقصقص ما ادري شو صاير فيه ..
..
حليب بوش ...سلامي عليج يالبدويه :)
..
تسلمين الغاليه
والحمدلله الصغاريه مبسوطين :)
خلينا الساحه إله ما إدربحنا من على العراقيب :)
...
وشكرا إنج رديتي على رورو
تسلمين الغاليه ما تقصرين :)
كنت بنحرج إتأخرت بالرد على التعليقات أنقذتيني :)
..
شدو حيلكم وسيروا البر وناااسه بهالوقت
..
في أمان الله

مهرة سالم يقول...

ناعمة الهمــس ...
تسلمين الغاليه ..
في حفظ الله

مهرة سالم يقول...

أمـــواج..
وعليكم السلام ورحمة الله وبركاته..
تسلمين يالغاليه
الله يرحمه ويغفره هو وموتى المسلمين أجمعين يارب
...
آمين يارب
وحفظ الله لك من تحبين وجمعكم الله في جنته
..
في حفظ الله أختي

مهرة سالم يقول...

مجرد أمنيــات ...
ما سمعتج أمي
لا يبالج يلسه معاها وهي بتفهمج أهمية الأكل :)
..
الصغاريه عليهم علوم
..
تسلمين الغاليه على مرورج
في أمان الله

مهرة سالم يقول...

محمد سعد القويري ..
جزيتم خيرا على دعوتكم
ووفقكم الله في ما يحبه ويرضاه
..
في امان الله

مهرة سالم يقول...

الغــــدوف...
هلا وغلا بكل الحلا ...
صج الجو عندنا حاليا جدا رائع
حياكم صوبنا وأحلى كشتت بر لأحلى غدوف :)
..
تسلمين يا قلبي
وحفظك الله من كل شر
وحفظ لكِ من تحبين
وجمعكم على طاعته في الدنيا
وفي جنته في الآخره
,..
في أمان الله

مهرة سالم يقول...

إليــكم...
وعليكم السلام ورحمة الله وبركاته..
بالفعل أخي من خلال متابعتي لمدونات ليبيه وجدت الكثير من التشابه
..
شكرا لمرورك
في حفظ الله

مهرة سالم يقول...

الشاعر الفنان أحمد فتحي فؤاد..
بالفعل استاذي
موقف طريف :)
بس ماشاء الله الآن لديك خبره بالمصطلحات وترجمتها :)
..
شكرا لتواصلك استاذي
في حفظ الله

مهرة سالم يقول...

عطش الصبــار ...
ياغاليه أهلا ومرحبا بكِ
بجد لكِ وحشه
يارب تكوني مبسوطه في إجازتك
حفظكِ الله أينما كنتِ
..
في أمان الله

مهرة سالم يقول...

ميـاســـه ....
حركات أنا شو عبالج:)
ما يحتاي بي بي كسرتهم بدونه
..
فديت سلحوفي
..
صدق شكرا للكل
على الطلعه الحلوه
وأن شاء الله تزيد طلعاتنا :)
بفضل حنتكم طبعا :)
....
في أمان الله حبيبتي

مهرة سالم يقول...

أم حروبي ....
وحليله الله يحفظلج الوالد يارب
وتراه صدقه غير الطلعه من فير الله :)
..
حبيبتي خلاص المره اليايه معانا إن شاء الله نتفق ونتيمع :)
..
قرص الدرب سويييت :)
أدريبج شراتي تحبين الكرك
...
شوفي شدي الهمه وخلصي الكورس وحني على راس أهلج وأحلى طلعت بر وحياكم صوبنا :)
..
في حفظ الله الغاليه ...

مهرة سالم يقول...

صفحات ملطخه بحروفي ...
الله يعافيج
تسلمين :)
وشكرا على مرورج
في أمان الله

غير معرف يقول...

مرحبا كان يوم جميل وناسه الحمد لله
وعن الذرة ما انتبهت لها لين ما شفتها فمدونتج بس حلوة الحركة تلاقين شما متاثرة بوالدها العزيز وصدج وشكرا للانج ما نفذتي تهديداتج وهذا الشكر خاصة من مرت خالج
وبعدين ليش ما كتبتي تسلم ايد الي قص البصل وشك المشاكيك.... زعلت
عالعموم كانت طلعة حلوة وان شاء الله دووم
محبتكم ...أحلى ام

مهرة سالم يقول...

أحلى أم....
هلا وغلا ...
الصغاريه مغامرات عندهم
وحليله أبو شمشومه لا تقولين عنه شي ما أرضى على ماي براذر :)
...
تسلم إييييييدج يا احلى أم اي نعم ما كلت من المشاكيك
بس ثانكس :)
...
كله ولا حرمت خالي ..أقول كم بتدفع إبتزاز
هههههههه
...
الله يديم علينا هالأجواء الحلوه
وتكثر طلعاتنا :)
وشكرا على مرورج الحلو ..
في أمان الله

cutemum يقول...

ماشاااء اللعه احب البر
وذكرياات الطفوووله
ولالله يديم المحبه مم بينكم
والمرة الياايه برز ويهي ويااكم خخخخخخخ

مهرة سالم يقول...

cutemum....
آمين يارب ..
صدق البر غيير
..
هههه وحليلج
حياج :)
....
في أمان الله

Heart Moon يقول...

ههه ب عارف على شوه ارد .. اونه شو ماي خالي من الدسم صدقت .. هع هع
وبخصوص الأكل شكله وايد يشهي وخاصة ع اجواء البر ..
وحليلهم غرزوا ما كملت المسيرة ههه ..
موضوع وايد ممتع ومرح .. تسلم ايدج
والسموحة لو الرد متأخر ما كنت وقتها من متابعينج ^_^
وبإنتظار يديدج

مهرة سالم يقول...

Heart Moon...
تسلم يا اخوي على الرد
جزاك الله خير على تواصلك
ودعواتك نسير البر ولك تقارير شراته :)
..
مرحبابك دوم
وتشرفني متابعتك
في حفظ الله

غير معرف يقول...

شمشومه ~~..

,,انشاء الله تتكرر معاكم
و تتونسون,,

شكرا~~..

مهرة سالم يقول...

شمشومه ..
أن شاء الله يارب :)
حياج الله حبيبتي شم شم :)
..
في حفظ الرحمن