الخميس، 5 أغسطس 2010

BENTOTAسيلان PART5

بسم الله الرحمن الرحيم...
السلام عليكم ورحمة الله وبركاته ..
ماشاء الله جد لما أتذكر اللفه إلي لفيناها
بسيلان أقول سبحان الله
كيف رب العالمين سخر لنا أمور كثيره
مثلا النقل يعني الجماعه قبل ماكان عندهم غير
الدواب
بعير خيل بغل ويآخذون سنين
لين مايوصلون والتنقل بين البر والبحر
سبحان الله
الحمدلله على نعمه التي لاتعد ولاتحصى ...
...
إنطلقنا من
yalla
إلى مدينـــه أكثر ما يقربنا له
هو إسمهــــا فقد
سميت على إسم الرحاله المسلم
إبن بطوطه
وتنطق حاليا بـ
BENTOTA
طبعا لو شفتوا الخريطه
بتحسون بمعنى إنك بالفعل زرت بلد
ماشاء الله تبارك الله علينا
..........
المهم يا جماعة الخير
خذنالنا حوالي خمس ساعات
إلى أن وصلنا هذه المنطقه
بس قبل الوصول بساعه ونص
حدث الآتي
سوما السائق يقول إلنا إذا حابين تريحون وتتغدون
في مركب متحرك تيلسون وتتغدون فيه وفيه مأكولات بحريه
طبعا إلي يشوف ويوهنا حزتها يقول إنا ممكن نشوت سوما من الباص ونكمل بدونه
تعــــــب فضيييع وطبعا الدوخه لازالت مستمره ومحد له بارض شي
قلناله لا سوما سير الفندق
طبعا سوما مايأس ورد يسأل كمن مره وإنه ممكن نرجع لو غيرنا راينا
ونحن منخنقين منه ونشوف المحيط الممتد
وبمزحه منه يسأله أخوي
كم باقي عن الفندق
قاله ستيل ون آور
وهو يضحك ونحن في حالت تعب وإرهاق
وشوي وإلا يقول وصلنا الفندق
تتترا
نزلنا الفندق ودخلنا ورتبنا موضوعنا وبعدين إكتشفنا الخطأ
بأننا سكنا في فندق مش فندقنا
لذلك يجب التأكد قبل السكن
طبعا إلي ماركزنا فيه حزتها إسم الفندق
كان المفروض نسكن في فندق خمس نجوم إسمه
TAJ bentota
وبدلا منه نزلنا في فندق أربع نجوم إسمه
bentota beach hotel
حقيقتا نحن من التعب ما كان إلنا بارض
نرمس أو نغير بالرغم من إن الفندق
ما عيبنا وايد بس شباب برحله وكملنا
............
أول ما وصلنا طلعنا الدري عشان نروح الريسبشن
وحتى تخلص الإجراءات كون أساسا ما إلنا حجز وتم تغيير الحجز
من مكتب السياحه إلي في سيريلانكا بدون الرجوع للمكتب في الإمارات
قعدنا ننتظر في الكوفي
وايامها كان سالفة كأس العالم


وأيضا تم تغيير غرفنا لأنه الحجز أساسا متلخبط
وحطونا في مكان مثل الشاليهات
بس عيبني الصراحه بعيد عن الآوادم ...
بس المب حلو فيه الدرب لازم تنزل وتطلع
أما إذا كان دخولنا من البلكونه يكون سهل..
.....
الغرفه ...






طبعا هذا الفندق مثل ريستور وأغلب الفنادق في هذه المنطقه

هي كذلك ...
هذا الفندق فيه
مسبـــح بس ماصورته لأنه مليان أجانب
جانب قريب للمسبح..



من أجمل الأماكن هذه وسط الفندق

بحيره وفيها أشجار مغنوليا
وأحلى شي لما الورد يطيح ويسبح وفليل ممكن تكون يلسه حلوه
لو الجو ساعد لأنه الجو عندهم حار رطب نهارا رطب معتدل مساءا

وهذا الدري دايركت
إلى المحيط وعلى الجنب حديقتين
وأماكن للعب الأطفال وأماكن لحمامات الشمس

الصغاريه يلعبون شوي عن خاطرهم ...
طبعا الإهتمام بالأفيال واضح جدا
وكبير وأغلب الأشياء ممكن تلاقي مكتوب
عليها بورن فري وكذلك وجود ميتم للأفيال
إلي ما رضينا نسيره وإلى اليوم وأمي تقول وحليلهم الأيتام ماشفناهم..
بس في الفندق خدمه إنك تغسل الفيل أو ما يسمونه بإيليفنت باث...
بس ما سرنا صوبه ..
حليله الفيل مندس عن الكاميرات ..

السناجب موجوده بكثره في هذه المنطقــه ..
عبودي يشوف السنجوب ..مستر سنجوب ..

ونحن نتمشى في الفندق
شوي وإلا أخوي يقول إلنا
شو رايكم برحلة بحريه
طبعا نحن كنا مكسلين وقلناله سير إنت والصغاريه
بس هو أصر وشوي إحتشر علينا إنتوا دومكم جذه
عيشوا المغامره ...
وخذنا جوله بحريه بس إكتشفت إني ما صورت غير المنصه وأما القوارب نسيتهم

بدينا الرحله وأصرينا تكون ساعه وحده بس
هم مايرضون إلا ساعتين...
ركبنا بعد ما لبسنا سترة النجاه ...
وشوي الكابتن السيلاني يقول إلنا شوفوا هذه السحليه ...


وهذا سوق الخضره ....
على فكره إذا كنتوا من محبي الطلعه
ممكن تسيرون السوق القريب من الفندق
بالتكتك ...
بيت ناس مطل على النهــر
نعم نحن كنا في النهر لأنه صعب تمشي في المحيط
كل موجه تهد جبل ...
بيت ناس ثانيين ...
بتشوفون أصحاب البيوت وهم يالسين عادي
يا يشتغل يا يقرا كتاب أو وحده تنشر الغسيل ..
وناسه بيوتهم ...


وبعدين دخلنا بين الأشجار على أساس إنه بيودينا نشوف الكروكودايل ...
القصار لا يحاتون عادي بتيلس شرات الملك
أما إخوانا لطوال كل واحد ينزل راسه حفاظا على سلامته...أول ما شفت الصوره ضحكت
الله يسلمكم هذا السيلاني مصمم إنه فيه
تمساح ويقولي شفتيه أقوله لا وهو يقول جدامج
وأنا أقول أي صوب وهو يأشر لين ما وصلنا
عند المكان إلي فيه التمساح وهو يقول هذا جدامج
أقول مافي شيئ ويين تقصد..
وآخر شي حرمة أخوي عطته كاميرتها يصور التمساح ويوم صوره شفناه
وحلييييله تمسوح صغيرووووون
بس شكيت بالموضوع إنه إحتمال رابطينهم لأنه من بعيد
وهو يقول هناك التمساح...

وطلعنا من أدغال البحار ...
هذا الشيبه يكون يالس كأنه يصيد
بس هو عنده تمسوح صغير بعد يعطيكم إياه تتصورون وياه
والأجانب مب مصدقين أما أنا فقلت للسيلاني
عن اشوفك توقف حذاله ....
وبعد عندهم صخره عوده بنص النهر تقريبا
مممكن تنزلون تتصورون عندها ..مسجــــد .....
والحلو في هذه المنطقه
أنها يوجد بها العديد من المساجد
وممكن تلاقي لوحات إرشاديه
بالعربي للمسجد ....


بيت ناس بعد
بس شوفوا ناريلتهم ماشاء الله
مدرســــه...حاولنا نعرف شو هالثمره ماعرفنا ...
فندقنــا من بعيد ...
نسيت أقول إلكم
إنه فندقنا يمر حذاله القطار
وعندما يمر القطار يطير الرقاد...
رجعنـــــا للفندق...
بس الصراحه صج غيرنا
جو كنا مضايجيين من أكثر من شغله
إنه الفندق مب هو الفندق إلي حاجزينه
وإنا رجعنا للحر والرطوبه ..

غــــرفنـــــــا
بلكونة غرفتنا
بس بلكونة غرفة أخوي أكبــــر ...

الفيو بتاع بلكونتنا ..
بس لناس إلي تسأل لا تخافون
لا ياجماعه في حارس موجود طوال الوقت ...
بس أحلى شي إنا نشوف الجيتيسكي والقوارب الشراعيه
وألعاب مائيه من البلكونه ...
وطبعا هذي نشاطات ممكن تأجر إلي تبيه ...
....
بتكلم شوي عن الفندق
الفندق حلو لا باس فيه
يوجد لديهم بوفيه
أكلهم حلو جربوا الوافل لذيذ
يوجد لديهم ليله للأكل البحري بس السعر يتغير مع وجود إستعراضات ..
وأغلب الأوقات يكون فيه اكثر من جهه للبوفيه
يعني الباستا والازانيا والأسباغتي يكون مكانهم منفصل عن البوفيه
بس يتبعون للبوفيه ...
اجــــانب في كل مكـــان
لذلك ما أحب أشرب في الأكواب كونهم يشربون فيها خمر
في البوفيه شفنا ناس من كل مكان
حتى معرس من ماليزيا ...
وحليله خجول والسيلاني ذبحه بالأسئله
حقيقتا الفندق محطي إجباري يكون اللبس
محتشم داخل البوفيه بس الأجانب مش محترمين القرار
والضحك فيه شخص أجنبي طول فترة إقامتنا وهو لابس وزار سيلاني
ويتمشى فيه في كل مكان ....
....
بالنسبه للمحلات يوجد محلات تابعه للفندق
فضيات وتذكارات وصالون ....
وفيه شخص ييلس فالليل في ركن في الفندق
يبيع منحوتات خشبيه ..
....
الكوفــي
كل يوم فيه حفل
أغاني ورقص
ونقل لمباريات كأس العالم..
المنطقه ما بقول ماعيبتني
بس بعد ما أنصح فيها إلا إذا كنت من محبي
الرياضات البحريه ...


هذا سنجوب
علاوي حاول يمسكه
وكل ما يجرب على السنجاب يرجع ورا ويقول
كله من شموه ما خلتني أزخه
ومسوي عمره بطل الجبـــان
ماشاء الله عليه
وشوي إلا كلنا وقفناله وقفه إمسكه محد بيقولك شي
إختك بعيد وكلنا بعيد علاوي
مسكين إتلخبط لغاية ماشرد السنجوب ...
ورجع يقول كله منكم ما خليتوني أزخه ...
.........
جارنا الرئيس
و
فلـــم هندي
في الجزء الأخير
من رحــلة سرنديـــب...
....
في حفظ الله

هناك 26 تعليقًا:

رورو الشخبوطه يقول...

ماتحبون المغامرات لو انا معاكم ماخليت شي ماجربته :)

ومتابعينج..

مشكوره..

~أم حرّوبي~ يقول...

ههههههه وناسه اسميه سوما عليه حركااات شكله وايد يستظرف دمه خخخ

بس كشخه ..عيبتني السالفه ^^

يعطيج العافيه ~

هديــل يقول...

التعب يهد الحيل يخليك ما تفكر بشي موليه :/

وين جايونة عن الفيلة :q

عجبتني المنطقة هذي ووناسة حلوة بيوتهم ع النهر
حتى المدرسة :>

ناطرين الجزء الأخير

يعطيج العافية =)

mese يقول...

صباح الخير..

يحليله سوما يريدكم تجربون كل شيء وتستانسون..بس معاج حق الطريق طويل خمس ساعات مب شوي..

يعني ما رقدتي زين ذيج الليله بسبب القطار يحليلج :/

حلوه سوالفكم..والصور بعد..

ودي وإحترآمي لكِ :)

المجاهد الصغير يقول...

السلام عليكم
صور جميله
تعقد

كل سنه وانتم بخيراللهم بلغنا رمضان
ندعوكم لمشاركه فى مسابق رمضان فى مدونتى المتواضعه

ــــارا sara ســـ يقول...

يارب يحفظك يا مهروه..
من جد رحله ممتعه,أعجبتني رحلة البحر وااايد ممتعه..
بس على فكرة صور المنطقه حلوة واااايد..
..
يسعدك ربي..

Crazy Nemo يقول...

جنه الله ف ارضه
ماشاء الله بجد المكان جميل جدا و الصور رائعه هى فكره غريبه انكو تروحو مكان بعيد كده بس تغيير و بجد حاجه جميله و تجربه ناجحه
تقبلى مرورى :)

r يقول...

السلام عليكم نهار
الاول كل سنه وانتى طيبه
وان شاء الله ينعاد عليكى رمضان بكل خير وكل اهل الامارات

واضح انه فاتنى رحلتك الكوكيه فى سرنديب من البدايه
بس الصور اللى اخدتيها رااائعه فعلا
احب كل صور الطبيعه والخضره والماء

هحاول ارجع شويه علشان استمتع بباقى الصور

Amwaj يقول...

مساء الخير :)

ما شاء الله كل منطقة أحلى من الثانية
عليكم بألف عافية

تحياتي :)

مهرة سالم يقول...

رورو الشخبوطــه....
حبيبتي تسلميين على متابعتج ..
دوما يسعدني وجودج..
...
ههههه
عيل يبيلج سيره أما نحن نحطم روح المغامره ...
..
في حفظ الله

مهرة سالم يقول...

أم حروبي...
سوما حركاته وايد ومصمم يراوينا كل شي في شيلان وخبلنابه بكلك NO soma go hotel
....
دام عيبج أن شاء الله تسيرين وتجربين ..
..
الله يعافيج
ومشكوره على هالمرور الحلو ..
..
في حفظ الله

مهرة سالم يقول...

هـــديل ...
صدق يا أختي من التعب يقفل العقل ما تفكرين غير بالراحه...
...
شو جايونه تعيبها لفيله ما أدري وإلا جان صورتلها كمن صوره ..
...
شفتي مدارسهم كشخه..
..
تسلمين على المتابعه حبوبه
في أمان الله

مهرة سالم يقول...

mese.......
مساج نور ونوير ...
سوما وحليله خبلنابه
من كثر ما نقوله الفندق يا سوما مانبي نسير سوما وهو يقول إنتوا ماشفتوا سيلان كله بالفندق ...
....
ليلتين ماشي رقاد لا وأزيد القطار وعقب صب مطر وبعدها السناجب تسولف بالبلكونه ....
..
مرورج الأحلى تسلمين..
...
في حفظ الله

مهرة سالم يقول...

المجاهد الصغير ...وعليكم السلام ورحمة الله وبركاته...
أهلا أختي أم أنس..
...
تسلمي يارب
وكل عام وأنتِ وعائلتك بألف خير
ورمضان مبارك علينا وعليكم يارب .....
أنا شفت المسابقه جميله جدا
وأن شاء الله أقدر أشارك...
...
في حفظ الله

مهرة سالم يقول...

ســـــارا ...
تسلمين سارونه الحمدلله عيبتج الصور ..
عاد نتريا صور رحلتج في المدونه ..
وأهم شي صورة البسطه هههههه
...
ربي يحفظج حبيبتي ..

مهرة سالم يقول...

Crazy Nemo...
بالفعل أختي أول ما يخطر في البال سبحان من أبدع وصور هذا الجمال ,...
جزيتِ خيرا على كلماتك الطيبه
أي نعم المكان بعيد بس تغيير جمييل ..
.....
أن شاء الله يدوم تواصلنا ...
في حفظ الله

مهرة سالم يقول...

بسنـــت ...
وعليكم السلام ورحمة الله وبركاته ...
أهلا يا بسنت تعرفي بجد وحشتيني وأنا آسفه مقصره معاكي جدا سامحيني...
....
وإنتِ طيبه وكل أهل مصر طيبين يارب ويعيده الله علينا وعليكم بالخير ...
....
المدونه تحت أمرك
وأن شاء الله تعجبكِ باقي الصور
وجزيتِ خيرا على كلماتك الطيبه غاليتي ..
.....
أستودعكِ الله

مهرة سالم يقول...

أمــــواج.....
مساء الخيــرات ....
الله يعافيج غاليتي جزيتِ خيرا ...
...
في أمان الله

Meme يقول...

سلام عليكم
يا سلام عالمغامرات يعني ماشيين بوسط النهر اللي فيه التماسيح و مبسوطه؟؟ لا و الله طلعتي شجاعه ما شاء الله عليكي
على فكره في تماسيح كبار و لا كلهم صغار؟ و البيوت موجوده على ضفاف نفس النهر اللي فيه التماسيح؟؟؟؟

مشكوره اختى على هالتقارير الروعه

طوبه فضه وطوبه دهب يقول...

كل رحله وانتم طيبين وكل عام وانتى بالف خير وصحه وسعاده

مهرة سالم يقول...

Meme......
وعليكم السلام ورحمة الله وبركاته...
شفتي الشجاعه يا ميمي لا يغرك كل التماسيح صغار بس السحالي حجمها كبير ...
وأي نعم البيوت على نفس النهر إلي فيه التماسيح ...
...
تسلمي يا ميمي على تواصللكِ
ووجودك الأروع..
..
في امان الله

مهرة سالم يقول...

طوبه فضه وطوبه دهب ....
وإنتِ بخير يا قمـــر ...
ومبارك عليكِ شهر رمضان وعلى عائلتك الكريمه أعاده الله علينا وعليكم بالخير ...
..
في أمان الله

غير معرف يقول...

وناسة
ماشاءالله كل جزء أحلى :)

مهرة سالم يقول...

Hopeless Sight...
تسلمين هذا من ذوقج
ويسعدني إنه التقارير عيبتج..
..
دمتِ بخير

همسات وبحــ الحياه ــر يقول...

كل سنة وانت طيبة

مهرة سالم يقول...

دموع القمـــر ..
وإنتِ طيبه يا قمر ومبارك عليكم الشهر ...